Bakı Şəhəri Binəqədi Rayon Məhkəməsi Qərardad — İş №2(001)-4003/2024

Azərbaycan Respublikası adından QƏRARDAD Bakı şəhəri İş № 2(001)-4003/2024 22.05.2024 BAKI ŞƏHƏRİ BİNƏQƏDİ RAYON MƏHKƏMƏSİ Mən, Bakı şəhəri Binəqədi Rayon Məhkəməsinin hakimi Mustafayev Etibar Mustafa oğlu İddiaçı Bakı Regional Qazın Satışı Departamentinə qarşı “əsassız hesablanmış borcun silinməsi” tələbinə dair iddia ərizəsini və ona əlavə edilmiş sənədləri 22 may 2024cü il tarixdə nəzərdən keçirərək M Ü Ə Y Y Ə N E T D İ M: İddiaçı Bakı Regional Qazın Satışı Departamentinə qarşı “əsassız hesablanmış borcun silinməsi”nə dair iddia ərizəsi ilə məhkəməyə müraciət etmişdir. Hesab edirəm ki, iddia ərizəsi ona əlavə edilmiş sənədlərlə birlikdə iddiaçıya geri qaytarılmalıdır. Belə ki, ərizəyə əlavə edilmiş Bakı şəhəri Binəqədi Rayon Məhkəməsinin xx.xx.2024cü il arixli, 2(001)-3086/2024 saylı qərardadı ilə “iddia ərizəsində iddiaçının ünvanı kimi “Binəqədi rayonu, Sulutəpə qəsəbəsi” göstərilməklə ünvan natamam ifadə olunmuş, habelə, iddiaçının həmin ünvanda yaşadığını təsdiq edən hər hansı sübut ərizəyə qoşma edilməməsi, eləcə də cavabdeh qismində cəlb edilmiş və hüquqi şəxs statusu təsdiq edilməyən Bakı Regional Qazın Satışı Departamentinin olduğu yer üzrə ünvanı və VÖEN-i barədə məlumatların göstərilməməsi əsası ilə iddia ərizəsi geri qaytarılmışdır”. Hazırda isə İddiaçı məhkəmənin qeyd edilən qərardadında iddia ərizəsinin geri qaytarılmasına əsas olmuş halları aradan qaldırmadan, təkrar eyni iddia ərizəsi ilə məhkəməyə müraciət etmişdir. Bununla bağlı məhkəmə qeyd edir ki, Azərbaycan Respublikasının Mülki Prosessual Məcəlləsinin 149.2-ci və 149.2.2-ci maddələrinə əsasən iddiaçının, onun nümayəndəsinin (əgər iddia ərizəsini nümayəndə təqdim edirsə), cavabdehin və işdə iştirak edən digər şəxslərin, şahidin və məhkəmə iclasına dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı, telefon nömrələri, o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları) ərizədə göstərilməlidir. Bundan əlavə, Mülki Prosessual Məcəllənin 149.2 və 149.2.3-cü maddəsinə əsasən, iddia ərizəsində iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb göstərilməlidir. Yuxarıda qeyd edilənləri nəzərə alaraq hesab edirəm ki, iddiaçının həqiqətən də Bakı şəhəri, Binəqədi rayonu, Sulutəpə qəsəbəsində yaşamasına dair sübut, eləcə də cavabdeh qismində cəlb edilmiş və hüquqi şəxs statusu təsdiq edilməyən Bakı Regional Qazın Satışı Departamentinin olduğu yer üzrə ünvanı və VÖEN-i barədə məlumatların işdə olmaması işin icraata qəbul edilərək baxılmasını qeyri mümkün hesab edən hallardır. Başqa sözlə qeyd edilən natamamlıq aradan qaldırılmadan işə baxılması mümkün deyildir. Belə olduğu halda İddiaçı Bakı Regional Qazın Satışı Departamentinə qarşı “əsassız hesablanmış borcun silinməsi” tələbinə dair iddia ərizəsi və ona əlavə edilmiş sənədlər geri qaytarılmalı və iddiaçıya qərardadda göstərilən nöqsanlar aradan qaldırıldıqdan sonra ümumi qaydada yenidən məhkəməyə müraciət etmək hüququ izah edilməlidir. Azərbaycan Respublikası Mülki Prosessual Məcəlləsinin: - 151.1-ci maddəsinə əsasən iddia ərizəsi həmin Məcəllənin tələblərinə riayət edilməklə verildikdə, onun məhkəmə icraatı mümkündür. - 152.1, 152.1.1-ci maddəsinə əsasən, iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə hakim iddia ərizəsini və ona əlavə edilmiş sənədləri geri qaytarır. Yuxarıda göstərilənlərə əsasən və Azərbaycan Respublikası Mülki Prosessual Məcəlləsinin 263, 264, 267 və 268-ci maddələrini rəhbər tutaraq, QƏRARAALDİM: İddiaçı Bakı Regional Qazın Satışı Departamentinə qarşı “əsassız hesablanmış borcun silinməsi” tələbinə dair iddia ərizəsi və ona əlavə edilmiş sənədlər geri qaytarılsın. İddiaçıya izah edilsin ki, qərardadda göstərilən nöqsanlar aradan qaldırıldıqdan sonra ümumi qaydada yenidən məhkəməyə müraciət etməyə mane olmur. Qərardad rəsmi qaydada verildikdən sonra 10 gün müddətində ondan Bakı şəhəri Binəqədi Rayon Məhkəməsinə şikayət verilə bilər. Hakim Etibar Mustafayev