Bakı Şəhəri Sabunçu Rayon Məhkəməsi Qərar — İş №3(008)-1343/2021

Azərbaycan Respublikası adından QƏRAR Bakı şəhəri İş № 3(008)-1343/2021 23.04.2021 BAKI ŞƏHƏRİ SABUNÇU RAYON MƏHKƏMƏSİ Bakı şəhəri, Sabunçu Rayon Məhkəməsinin hakimi Zeynalov Mirheydər Seyidəmir oğlunun sədrliyi, Məhkəmə iclasının katibi Həsənova Familə Məhəmməd qızının katibliyi, İnzibati xəta törətməkdə təqsirləndirilən hüquqi şəxs “X2 Kömək” İctimai Birliyinin nümayəndəsi X1 iştirakları ilə “X2 Kömək” İctimai Birliyinin Azərbaycan Respublikasının İXM-in 485.2-ci maddəsi ilə inzibati məsuliyyətə cəlb olunmasına dair Azərbaycan Respublikası Dövlət Gömrük Komitəsi Bakı Baş Gömrük İdarəsindən daxil olmuş materiala məhkəmənin inzibati binasında açıq məhkəmə iclasında baxaraq, məhkəmə müəyyən etdi: Azərbaycan Respublikasının Dövlət Gömrük Komitəsi Bakı Baş Gömrük İdarəsi tərəfindən “X2 Kömək” İctimai Birliyinin Azərbaycan Respublikasının İXM-in 485.2-ci maddəsi ilə inzibati xəta törətməsinə dair material daxil olmuşdur. Məhkəməyə təqdim edilmiş Dövlət Gömrük Komitəsinin Bakı Baş Gömrük İdarəsi tərəfindən tərtib olunmuş 05 fevral 2021-ci il tarixli, 00100-0211/21 saylı protokoldan və ona əlavə edilmiş sənədlərdə qeyd olunur ki, Bakı şəhəri, Sabunçu rayonu, Bakıxanov ŞTQ, L.Məmmədbəyova küçəsi ev 106 ünvanında qeydiyyatda olan “X2 Kömək” İctimai Birliyinin adına Rusiya Federasiyasından B222BO05/AK407905 nömrəli nəqliyyat vasitəsi ilə daxil olmuş yüklər **********4926 sorğu nömrəli 27.01.2021-ci il tarixli gömrük bəyannaməsi və digər sənədlərin araşdırılması zamanı məlum olmuşdur ki, “X2 Kömək” İctimai Birliyinin ünvanına B222BO05/AK407905 nömrəli nəqliyyat vasitəsi ilə daxil olmuş yüklərə dair AR Gömrük Məcəlləsi 113.1-ci maddəsi ilə müəyyən edilmiş qaydada mallar gömrük sərhəddini keçənədək elektron qaydada qısa idxal bəyannaməsi təqdim edilməmişdir. İnzibati xəta törətməkdə təqsirləndirilən hüquqi şəxs “X2 Kömək” İctimai Birliyinin nümayəndəsi X3 izahatında bildirdi ki, birliyin üzvləri Şəhid ailələrinin, Qarabağ qazilərinin və Vətən Müharibəsi iştirakçılarının sosial rifah halının yaxşılaşdırılmsı məqsədi ilə 28.12.2020-ci il tarixində Rusiya Federasiyasında fəaliyyət göstərən “Odlar Yurdu” diaspora təşkilatına müraciət ünvanlanmış, 09.01.2021-ci il tarixdə müraciətə müsbət cavab verilərək 27.01.2021-ci il tarixdə Rusiya Federasiyasından Diaspora Təşkilatının dəstəyi ilə 80 ton soğan yardım olaraq göndərilmişdir. Həmin məhsulun bir hissəsi digər ərzaq məhsulları ilə əvəzləşdirilərək sovqatlar halında hazırlanıb birliyin ehtiyaclı təbəqəsinə müxtəlif vaxtlarda çatdırılmışdır. Qeyri-kommersiya məqsədi ilə göndərilən yardım gömrük işçilərinin texniki səhvi nəticəsidə gömrük bəyannaməsinin gecikdiyi üçün inzibati qaydada birlik barəsində protokol tərtib edilmişdir. İnzibati xəta tərkibi olmadığından inzibati protokol üzrə icraata xitam verilməsini xahiş edir. Azərbaycan Respublikasının Dövlət Gömrük Komitəsi Bakı Baş Gömrük İdarəsinə məhkəmə iclasının vaxtı və yeri barədə qanunvericiliklə müəyyən edilmiş qaydada məlumat verilməsinə baxmayaraq, həmin təşkilatdan nümayəndə məhkəmə iclasına gəlməmiş və bunun səbələri barədə də məhkəməyə heç bir məlumat verməmişdir. Məhkəmə işə Azərbaycan Respublikasının Dövlət Gömrük Komitəsi Bakı Baş Gömrük İdarəsinin nümayəndəsinin iştirakı olmadan baxılmasını mümkün hesab etmişdir. Məhkəmə hesab edir ki, “X2 Kömək” İctimai Birliyi tərəfindən Azərbaycan Respublikası İnzibati Xətalar Məcəlləsinin 485.2-ci maddəsində nəzərdə tutulmuş inzibati xətanın törədilməsi iş materialları ilə sübuta yetirilməmişdir. Azərbaycan Respublikasının Gömrük Məcəlləsinin 113-cü maddəsinin 1-ci bəndinə əsasən fiziki şəxslər tərəfindən gömrük sərhədindən kommersiya məqsədləri üçün nəzərdə tutulmayan malların keçirilməsi halları istisna olmaqla, mallar gömrük ərazisinə gətirilməzdən əvvəl gömrük orqanlarına elektron formada qısa idxal bəyannaməsi verilir. Qısa idxal bəyannaməsinin verilməməsi bəyannaməçinin inzibati məsuliyyətinə səbəb olur. Azərbaycan Respublikasının İnzibati Xətalar Məcəlləsinin 485.2-ci maddəsinə əsasən, Azərbaycan Respublikasının Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə vəzifəli şəxslər min manat məbləğində, hüquqi şəxslər min beş yüz manat məbləğində cərimə edilir. Azərbaycan Respublikasının İnzibati Xətalar Məcəlləsinin 25.1-ci maddəsinə əsasən inzibati cərimə bu Məcəllədə nəzərdə tutulmuş hallarda hakim, səlahiyyətli orqan (vəzifəli şəxs) tərəfindən təyin edilən və təqsirkar şəxsdən dövlətin xeyrinə tutulan pul məbləğidir. Məhkəmə iclasında İnzibati xəta törətməkdə təqsirləndirilən hüquqi şəxs “X2 Kömək” İctimai Birliyinin nümayəndəsi X3 tərəfindən məhkəməyə təqdim edilmiş 15.04.2021-ci il tarixli 305 nömrəli məktubdan və ona əlavə edilmiş fotoşəkillərdən görünür ki, birliyin üzvləri Şəhid ailələrinin, Qarabağ qazilərinin və Vətən Müharibəsi iştirakçılarının sosial rifah halının yaxşılaşdırılmsı məqsədi ilə 28.12.2020-ci il tarixində Rusiya Federasiyasında fəaliyyət göstərən “Odlar Yurdu” diaspora təşkilatına müraciət ünvanlanmış, 09.01.2021-ci il tarixdə müraciətə müsbət cavab verilərək 27.01.2021-ci il tarixdə Rusiya Federasiyasından Diaspora Təşkilatının dəstəyi ilə 80 ton soğan yardım olaraq göndərilmişdir. Həmin məhsulun bir hissəsi digər ərzaq məhsulları ilə əvəzləşdirilərək sovqatlar halında hazırlanıb birliyin ehtiyaclı təbəqəsinə müxtəlif vaxtlarda çatdırılmışdır. Azərbaycan Respublikası İXM-nin 12-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Azərbaycan Respublikası İXM-nin 76-cı maddəsinə əsasən inzibati xətanın olubolmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Azərbaycan Respublikası İXM-nin 112.1.4.-cü maddəsinə əsasən iş üzrə icraatda iştirak edən şəxslərin gəlməmələrinin səbəbləri araşdırılır və həmin şəxslərin iştirakı olmadan işə baxılma və ya işə baxılmanın başqa vaxta keçirilməsi məsələsi həll edilir. Azərbaycan Respublikası İnzibati Xətalar Məcəlləsinin 105.1-ci maddəsinə əsasən, bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Həmin Məcəllənin 53.0-cı maddəsinə əsasən aşağıdakı hallarda inzibati xətalar haqqında işlər üzrə icraat başlanıla bilməz, başlanmış icraata isə xitam verilir: 53.0.1. inzibati xəta hadisəsi olmadıqda; 53.0.2. inzibati xəta tərkibi olmadıqda; 53.0.3. şəxs son zərurət vəziyyətində hərəkət etdikdə; 53.0.4. şəxs zəruri müdafiə vəziyyətində hərəkət etdikdə; 53.0.5. inzibati məsuliyyət müəyyən edən normativ hüquqi akt ləğv olunduqda; 53.0.6. bu Məcəllənin 38-ci maddəsində nəzərdə tutulmuş müddətlər başa çatdıqda; 53.0.7. barəsində inzibati xəta haqqında iş üzrə icraat aparılan şəxsə aid eyni fakt üzrə inzibati tənbeh etmək haqqında hakimin, səlahiyyətli orqanın (vəzifəli şəxsin) qərarı olduqda, yaxud inzibati xəta haqqında işə xitam verilməsi barəsində ləğv edilməmiş qərar olduqda, habelə həmin fakt üzrə cinayət işi başlamaq haqqında qərar olduqda; 53.0.8. barəsində inzibati xəta haqqında iş üzrə icraat aparılan şəxs öldükdə; 53.0.9. Bu Məcəllənin 157 və 158-ci maddələrində nəzərdə tutulmuş inzibati xətanı törətmiş şəxs zərər çəkmiş şəxslə barışdıqda. Azərbaycan Respublikası İnzibati Xətalar Məcəlləsinin 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. Azərbaycan Respublikası İnzibati Xətalar Məcəlləsinin 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Məhkəmə hesab edir ki, sübutetmə yükü inzibati xəta haqqında protokol tərtib edən inzibati orqanın üzərində olduğu üçün inzibati xəta haqqında iş materiallarla birlikdə sübuta yetirilmədiyindən və İXM-nin 53.0.2-ci maddəsinə əsasən “X2 Kömək” İctimai Birliyi tərəfindən İXM-nin 113.1-ci maddəsində qeyd edilən inzibati xəta hadisəsi, yəni kommersiya məqsədləri üçün yüklər gətirilməməsi ilə əlaqəar inzibati xəta tərkibi olmadığından inzibati xəta haqqında iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 48-51, 61, 62, 114, 128-130-cu maddələrini rəhbər tutaraq qərara aldı: Azərbaycan Respublikası Dövlət Gömrük Komitəsi Bakı Baş Gömrük İdarəsi tərəfindən “X2 Kömək” İctimai Birliyi barəsində Azərbaycan Respublikası İnzibati Xətalar Məcəlləsinin 485.2-ci maddəsi ilə nəzərdə tutulmuş əməlin törədilməsinə dair inzibati xəta haqqında işin icraatına xitam verilsin. Qərarın surəti rəsmi qaydada təqdim edildiyi və ya alındığı gündən 10 (on) gün müddətində qərarı qəbul etmiş məhkəmə vasitəsi ilə və ya birbaşa Bakı Apellyasiya Məhkəməsinə şikayət və ya protest verilə bilər. Sədrlik edən: Mirheydər Zeynalov