Abşeron Rayon Məhkəməsi Qərardad — İş №3(012)-1170/2021

Azərbaycan Respublikası adından QƏRARDAD Xırdalan şəhəri İş № 3(012)-1170/2021 10.08.2021 ABŞERON RAYON MƏHKƏMƏSİ Mən, Abşeron Rayon Məhkəməsinin hakimi Həsənov Vaqif İskəndər oğlu, Şəxs barəsində Azərbaycan Respublikası Dini Qurumlarla İş üzrə Dövlət Komitəsi Sumqayıt Bölgəsi üzrə Şöbəsindən daxil olmuş inzibati xəta haqqında materiala işin baxılmağa hazırlanması zamanı baxaraq, MÜƏYYƏN ETDİM: 10 avqust 2021-ci il tarixdə Şəxs barəsində Azərbaycan Respublikası İnzibati Xətalar Məcəlləsinin 516.0.2-ci maddəsində nəzərdə tutulmuş inzibati xətanı törətməsi haqqında Azərbaycan Respublikası Dini Qurumlarla İş üzrə Dövlət Komitəsi Sumqayıt Bölgəsi üzrə Şöbəsi tərəfindən protokol tərtib edilərək baxılması üçün Abşeron Rayon Məhkəməsinə göndərilmiş və material 10 avqust 2021-ci il tarixdə məhkəməyə daxil olmuşdur. Həmin protokola görə Şəxs - Abşeron rayonu, Xırdalan şəhəri,Ər-Riyad ticarət mərkəzi 30.07.2021-ci il tarixdə ixtisaslaşdırılmış satış məntəqəsindən kənarda dini kitablar və dini əşyalar satır. İşin baxılmağa hazırlanması zamanı müəyyən olunmuşdur ki, məhkəməyə təqdim edilmiş iş materiallarına inzibati xəta haqqında protokol tərtib edilərkən bu barədə barəsində icraat aparılan hüquqi şəxsə protokolun surətinin Şəxs təqdim edilməsi göstərilmişdir. İnzibati xəta haqqında material nəzərdən keçirilərkən müəyyən edilmişdir ki, protokol Azərbaycan Respublikası İnzibati Xətalar Məcəlləsinin 100-cü maddəsində nəzərdə tutulmuş rekvizitlər üzrə düzgün tərtib olunmamışdır. Belə ki, inzibati xəta haqqında iş materallarından görünür ki, inzibati xəta haqqında protokolda barəsində inzibati xəta haqqında iş üzrə icraat aparılan şəxsin izahatı göstərilməmişdir. Azərbaycan Respublikası İnzibati Xətalar Məcəlləsinin 109.1.6-cı maddəsinə əsasən, protokol və digər materiallar səlahiyyəti olmayan şəxslər tərəfindən tərtib olunduqda, protokol və digər sənədlər düzgün tərtib olunmadıqda, yaxud təqdim edilmiş sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə qərardad qəbul edir. İstinad edilən maddələrin tələbləri baxımından məhkəmə hesab edir ki, inzibati xəta haqqında protokol düzgün tərtib olunmadığına görə inzibati xəta haqqında protokol onu tərtib etmiş orqana qaytarılmalıdır. Yuxarıda göstərilənlərə əsasən və Azərbaycan Respublikası İXM-nin 43, 53, 100, 106-111-ci maddələrini rəhbər tutaraq, QƏRARA ALDİM: Azərbaycan Respublikası Dini Qurumlarla İş üzrə Dövlət Komitəsi Sumqayıt Bölgəsi üzrə Şöbəsi tərəfindən Şəxs barəsində Azərbaycan Respublikası İnzibati Xətalar Məcəlləsinin 516.0.2-ci maddəsi üzrə tərtib olunmuş inzibati xəta haqqında protokol və ona əlavə edilmiş sənədlər Azərbaycan Respublikası Dini Qurumlarla İş üzrə Dövlət Komitəsi Sumqayıt Bölgəsi üzrə Şöbəsinə qaytarılsın. Qərardaddan apellyasiya şikayəti verilə bilməz. Hakim: Vaqif Həsənov